NGLESTANTUNAKEN SENI LAN KABUDAYAN JAWI
Assalamualaikum Wr.
Wb.
Rumentahing puja hastawa saking
ngarsaning Gusti ingkang Maha Agung mugia tansah kajiwa kasarira dhumateng para
rawuh ingkang sinuba ing pakurmatan.
Nuwun.......
Dhumateng panitya aben wasis sesorah basa jawi ingkang
satuhu dhahat kinabekten,
Katur pangarsanipun juru
pambiji ingkang kinurmatan,
Mboten kesupen
dhumateng para rawuh ingkang satuhu bagya mulya.
Wonten ing klodhangan menika, kepareng
kula badhe ngaturaken sesorah babagan nglestantunaken seni lan budaya jawi.
Ananging saderengipun sumangga langkung rumiyin kula lan panjenengan
tansah ngaturaken puji syukur dhumateng Gusti ingkang Maha Agung, awit saking
kamirahaipun kula lan panjenengan taksih pinaringan kabegjan, kawilujengan saha
kalodhangan satemah kita saged makempal
wonten ing adicara menika. .
Para rawuh ingkang satuhu bagya
mulya.
Wonten ing jaman globalisasi samenika,
seni lan kabudayan saya campur-bawur mboten cetha asal-usulipun. Langkung-langkung seni lan kabudayan jawi, mboten
namung kagerus dening budaya manca suku kemawon, ananging ugi dening budaya
manca nagari. Kathah seni budaya manca ingkang ngawonaken kabudayan kita.
Ngantos kedadosan kathah lare mijil saking kulawarga lan tanah jawi ananging
mboten saged matur mawi basa jawi lan mboten mangertos seni lan budayanipun
piyambak. Menawi ingkang kados makaten kula lan panjenengan mboten enggal
gumrigah njagi nguri-uri, mboten mokal saya dangu kabudayan jawi saya sirna.
Pramila sumangga kula lan
panjenengan sareng-sareng nglestantunaken seni lan budaya jawi, sampun ngantos
lena lan kesengsem kaliyan budaya manca ingkang nggegimiri. Mangretasa bilih
bangsa-bangsa ingkang majeng kadosta Cina, Korea, Jepang lan sanes-sanesipun
tansah kiyat sanget anggenipun njagi amrih lestantunipun seni lan budayanipun.
Langkung-langkung seni lan budaya
jawi ingkang sampun kawentar kaluhunganipun wiwit kina-makina, mboten namung wonten tlatah Nuswantara
kemawon, ananging ugi ngantos saubenging jagad donya.
Kathah Piyantun, Piagung saking
manca nagari ingkang sami rawuh wonten mriki amargi gandrung kaliyan seni
budaya jawi, banjur sami sinau lan ngawontenaken paneliten budaya jawi kadosta
seni karawitan, tari lan padhalangan. Ngantos kathah piyantun manca ingkang dados
pakar basa, seni, lan budaya jawi.
Kedadosan ingkang makaten menika, punapa inggih kula lan panjenengan minangka tiyang
ingkang wiyos lan gesang mapan wonten tlatah tanah jawi mboten lingsem ? .......................
mesthinipun inggih lingsem.
Pramila sumangga sepisan malih kula
ngajak dhumateng kula lan panjenengan sedaya sareng-sareng nguri-uri amrih saya
ngrembaka saha lestantunipun seni lan budaya jawi, sampun ngantos seni lan kabudayan
kula lan panjenengan dipunklaim dening
nagari manca, menapa malih seni lan kabudayan jawi menika didhaku dening nagari
manca. Mula menika sareng-sareng dipunjagi, dipunngrembakaaken, lan dipun
lestantunaken.
Ing salajengipun sedaya ingkang
sampun katur wonten ing nginggil mugia saged dipunmidhangetaken, dipunpirsani,
dipunraosaken, lan dipuntindakan, ing kulawarga penjenengan saha kula puyambak,
sumrambah ing pawiyatan, ing bebrayan, utaminipun dening masyarakat saha
generasi mudha ing Nuswantara. Supados ing mangkenipun, lajeng tuwuh greget
saut tandang grayang ingkang tundhonipun andadosaken seni lan kabudayan jawi punika amrih tansah ngrembaka lan lestantun.
Kados namung makaten ingkang saged kula aturaken, menawi wonten
kelepatanipun kula nyuwun agunging samudra pangaksami. Awit saking
kawigatosanipun kula aturaken agunging panuwun.
Wassalamualaikum Wr.
Wb.
No comments:
Post a Comment